ریاض ۔ 21؍ اکٹوبر ۔ (ایجنسیز): سعودی عرب کے ایک سابق اعلیٰ عہدیدار نے حکومت اور سعودی ذرائع ابلاغ کی جانب سے صہیونیوں کے حوالے سے اپنائے گئے بیانیے اور پالیسی پر شدید اعتراضات اٹھائے ہیں، خاص طور پر فلسطینیوں پر جاری مظالم کے خلاف خاموشی پر۔
سابق ڈائریکٹر جنرل اسلامی تعاون تنظیم (او آئی سی) کی تعلیم، سائنس، اور ثقافت کمیٹی ‘‘آئیسکو’’ کے عبدالعزیز بن عثمان التویجری نے سوشل میڈیا پلیٹ فارم ‘‘ایکس’’ پر اپنی پوسٹ میں سعودی حکومت کے طرز عمل اور فلسطینی کاز کے لیے اپنائی گئی بے حسی پر کڑی تنقید کی۔ انہوں نے کہا کہ بچپن سے ہم یہ سنتے آئے ہیں کہ صہیونی ریاست ایک غاصب ریاست ہے، جس نے فلسطین کی سرزمین پر ناجائز تسلط قائم کر رکھا ہے اور عرب قوم کے جسم میں ایک خنجر پیوست کر دیا ہے۔ انہوں نے واضح الفاظ میں کہا کہ صہیونی ریاست ہمارے ازلی اور ابدی دشمن ہیں اور انشاء اللہ ہم ہمیشہ اسی اصول پر قائم رہیں گے۔
المدير العام السابق للمنظمة الإسلامية للتربية والعلوم والثقافة "الإيسيسكو"، السعودي عبد العزيز بن عثمان التويجري:
— Hanzala (@Hanzpal2) October 20, 2024
لقد نشأنا منذ الصغر على أن الكيان الصهيوني مغتصبٌ لأرض فلسطين وخنجرٌ مغروسٌ في جسد الأمة وعدوٌّ لها، وسنبقى على هذا الموقف بإذن الله مهما تصهينَ من زاغ قلبه وضلّ… pic.twitter.com/gpwj8UWdlW
التویجری نے اپنے پیغام میں ان افراد کو بھی تنقید کا نشانہ بنایا جو فلسطینیوں کے حق میں کھڑے ہونے کے بجائے اسرائیل کی حمایت کر رہے ہیں۔ انہوں نے کہا کہ جو لوگ فلسطینیوں کی آزادی کی راہ سے بھٹک چکے ہیں وہ ہمارے لیے کسی بھی طرح قابل تقلید نہیں ہیں۔
یحییٰ السنوار کی شہادت اور سعودی ردعمل پر افسوس
سابق سعودی عہدیدار نے خاص طور پر حماس کے سیاسی شعبے کے سربراہ، شہید یحییٰ السنوار کی شہادت پر سعودی شخصیات اور میڈیا کی طرف سے اسرائیل کی حمایت کو افسوسناک قرار دیا۔ انہوں نے کہا کہ یہ سمجھنا ممکن ہے کہ اسرائیل اپنے دشمن کے قتل پر جشن منائے، لیکن سعودی شخصیات کی جانب سے السنوار کی شہادت پر خوشی اور اسرائیل کے موقف کی حمایت بالکل ناقابل فہم ہے۔
التویجری کا یہ ردعمل ایسے وقت میں سامنے آیا ہے جب سعودی ٹی وی چینل ‘‘ایم بی سی’’ نے غزہ کے خلاف اسرائیلی جنگ کی حمایت میں ایک جارحانہ رپورٹ نشر کی۔ یہ رپورٹ، ایم بی سی پروگرام کی 74 ویں قسط تھی، جس میں فلسطینی مزاحمتی رہنماؤں کو دہشت گرد قرار دیتے ہوئے کہا گیا کہ اسرائیل نے دہشت گردوں سے نجات کا سفر مکمل کر لیا ہے۔ رپورٹ میں خاص طور پر یحییٰ السنوار جیسے رہنماؤں کو نشانہ بنایا گیا اور ان کو دنیا کے لیے دہشت کا منبع قرار دیا گیا۔
عرب دنیا میں شدید ردعمل
التویجری کے بیان کے بعد، متعدد عرب ممالک میں سوشل میڈیا صارفین نے بھی السنوار کی شہادت اور سعودی میڈیا کے ردعمل پر اپنی شدید ناراضگی کا اظہار کیا۔ سوشل میڈیا پر مختلف صارفین نے سعودی میڈیا کے فلسطینی مزاحمتی تحریک اور اس کے قائدین کے خلاف اپنائے گئے منفی بیانیے کی مذمت کی۔
سعودی میڈیا کے اس رویے نے نہ صرف فلسطینیوں کے حامیوں میں غم و غصے کی لہر دوڑائی ہے بلکہ اس سے سعودی حکومت کے فلسطین کے حوالے سے مستقبل میں اختیار کیے جانے والے ممکنہ طرز عمل پر بھی سوالات کھڑے ہو گئے ہیں۔
