حزب اللہ کا اسرائیلی وزیر اعظم کے گھر پر ڈرون حملہ

تل ابیب ۔ 19؍ اکٹوبر ۔ (ایجنسیز): تازہ ترین خبروں کے مطابق صیہونی اسرائیلی وزیراعظم بن یامین نیتن یاہو کے گھر پر لبنان کی جانب سے ایک ڈرون حملہ کیا گیا ہے۔ صیہونی اسرائیلی وزیر اعظم کے ترجمان نے تصدیق کی ہے کہ نیتن یاہو اور ان کی اہلیہ اس وقت گھر پر موجود نہیں تھے اور کسی کے زخمی ہونے کی کوئی اطلاع نہیں ملی ہے۔

نیتن یاہو کی رہائش گاہ شمالی اسرائیل کے شہر قیصریہ میں واقع ہے۔ اسرائیلی فوج کے مطابق ہفتہ کی صبح کو لبنان سے تین ڈرون لانچ کیے گئے جن میں سے ایک ڈرون نے ایک عمارت کو نشانہ بنایا جبکہ باقی دو ڈرونز کو تباہ کر دیا گیا۔ جابر اسرائیلی فوج نے ابتدائی طور پر یہ وضاحت نہیں کی تھی کہ کون سی عمارت کو نشانہ بنایا گیا، تاہم اب تصدیق ہو چکی ہے کہ یہ دہشت گرد نیتن یاہو کا گھر تھا۔

قیصریہ کے علاقے میں دھماکوں کی آوازیں سننے کی اطلاعات ہیں، اور اسرائیل کی ایمبولینس سروس اور پولیس نے بھی ان آوازوں کی تصدیق کی ہے، لیکن کوئی جانی نقصان نہیں ہوا ہے۔

عرب میڈیا کے مطابق صیہونی اسرائیلی میڈیا نے بتایا ہے کہ حملے کے بعد قیصریہ کے اوپر اسرائیلی جنگی طیارے اور ہیلی کاپٹر پرواز کر رہے ہیں، اور پولیس کے بڑے دستے اس مقام کی طرف بڑھ رہے ہیں جہاں حملہ ہوا ہے۔

صیہونی اسرائیلی فوج نے مزید کہا ہے کہ لبنان سے شمالی اسرائیل پر پچھلے ایک گھنٹے میں تقریباً 55 میزائل فائر کیے گئے ہیں۔ یہ میزائل بالائی، مغربی، اور وسطی گلیلی کے مختلف شہروں اور قصبوں میں سائرن بجنے کا باعث بنے ہیں۔ کچھ میزائلوں کو فضاء میں ہی تباہ کر دیا گیا جبکہ کچھ آبادی سے دور علاقوں میں گرے ہیں۔ ان حملوں میں حیفا کے قریب دو افراد معمولی زخمی ہوئے ہیں۔