غزہ ۔ 18؍ اکٹوبر ۔ (پی آئی سی): حماس کے سیاسی بیورو کے سربراہ یحییٰ السنوار غاصب اسرائیلی افواج کے ساتھ 17؍ اکٹوبر (جمعرات) کو ایک معرکہ آرائی کے دوران جامِ شہادت نوش کر گئے۔ رفح کے علاقے تل السلطان میں ہونے والے اس مسلح تصادم میں حماس کے بہادر کمانڈر کی شہادت کی تصدیق خلیل الحیہ، جو حماس کے سیاسی بیورو کے رکن ہیں نے آج جمعہ کے روز کی۔
خلیل الحیہ نے اپنے بیان میں کہا کہ یحییٰ السنوار نے دشمن کے خلاف لڑتے ہوئے اپنے جان کی قربانی پیش کی۔ وہ ایک بہادر مجاہد تھے جو شہادت کے عظیم مرتبے پر فائز ہوئے اور انہوں نے زندگی کی آخری سانس بھی فلسطینی قوم اور اسلامی تحریک مزاحمت کے لیے لڑتے ہوئے لی۔
حماس نے ایک سرکاری بیان میں یحییٰ السنوار، المعروف ‘‘ابو ابراہیم’’، کی شہادت پر گہرے دکھ اور افسوس کا اظہار کیا ہے اور انہیں عظیم قومی ہیرو قرار دیا ہے۔
