سہارنپور میں کتوں کا مدرسہ کی 4 لڑکیوں پر شدید حملہ۔ چہرے کا گوشت نوچ کر کھاگئے’ ہاتھوں ’ پیروں پر بھی شدید زخم آئے

سہارنپور ۔ 7؍ نومبر ۔ (اردو لائیو): سہارنپور میں آوارہ کتوں کے جھنڈ نے 4 معصوم لڑکیوں پر حملہ کر دیا۔ یہ لڑکیاں مدرسے سے لوٹ رہی تھیں۔ کتوں نے ان لڑکیوں کو گھیرا تو وہ بھاگنے لگیں۔ مگر کتوں نے دوڑا کر انہیں گھیر کر نوچنا شروع کر دیا۔ کتے 2 لڑکیوں کے چہرے کا گوشت نوچ کر کھا گئے۔ ان کے سینے اور ہاتھوں پر بھی گہرے زخم آئے۔

معصوموں کی چیخ پکار سن کر گاؤں کے لوگ دوڑ پڑے اور کتوں کو لاٹھیوں سے مار کر بھگادیا۔ لڑکیوں کو فوراً قریب کے کمیونٹی ہیلت سنٹر (سی ایچ سی) لے جایا گیا۔ لڑکیوں کو شدید زخمی حالت میں دیکھتے ہوئے وہاں سے انہیں ہائر سنٹر ریفر کر دیا گیا۔ معاملہ گنگوہ کے سانگاتھڑا گاؤں کا ہے۔

پہلے ایک کتا آیا پھر پورا جھنڈ آ گیا جمعرات کی صبح سانگاتھڑا گاؤں کی زینب (6)، سمیہ (4)، صدانہ (5) اور نبیہ (6) مدرسے میں پڑھنے گئی تھیں۔ وہ پڑھ کر لوٹ رہی تھیں۔ تبھی ایک کتا ان کے سامنے آ گیا اور بھونکنے لگا۔ کچھ ہی دیر میں اور بھی کتے آ گئے۔ ان سے بچنے کے لیے لڑکیاں بھاگنے لگیں، تو کتوں نے بھی ان کا پیچھا کیا۔

کتوں نے جھپٹ کر انہیں گرا دیا۔ پھر گھیر کر نوچنے لگے جس کی وجہہ یہ معصوم لڑکیاں شدید طور پر زخمی ہو گئیں۔ ان کے جسم کے مختلف حصوں سے خون بہنے لگا۔ گنگوہ سی ایچ سی کے ڈاکٹر نے کہاکہ 2 بچیوں کے چہرے کا گوشت کتے نوچ کر لے گئے’ لڑکیاں شدید زخمی ہیں۔