بندر کی موت کے بعد مادہ بندر نے بھی خودکشی کر لی۔ ہندو رسم و رواج کے مطابق آخری رسومات ادا

روہتاس’ بہار۔ 17؍ ستمبر ۔ (اردو لائیو): بہار میں بندر اور مادہ بندر کی موت کا کافی چرچا ہے۔ دراصل روہتاس ضلع میں بندر اور بندریا کی موت کے بعد دونوں کی آخری رسومات ہندو رسم و رواج کے مطابق ادا کی گئیں۔ میڈیا رپورٹس کے مطابق دونوں کی موت کے بعد بہت سے لوگ کہہ رہے ہیں کہ پہلے بندر کی موت کے بعد مادہ بندر نے علیحدگی کی وجہ سے اپنی جان دے دی۔
ان دونوں کی 16؍ ستمبر (پیر) کو ضلع کے ڈیہری علاقے میں ڈالمیا نگر’سدھولی روڈ پر موت ہوگئی۔ بتایا جا رہا ہے کہ اچانک ایک بندر وہاں سے گزرنے والی ہائی وولٹیج تار سے ٹکرا گیا۔ کرنٹ لگنے سے بندر کی موت ہو گئی۔ بندر کی موت کے بعد وہاں موجود لوگوں نے اس کی آخری رسومات کی تیاریاں شروع کر دیں۔ بندر کی موت کے بعد اس کی اطلاع محکمہ جنگلات کو بھی دی گئی۔
بتایا جا رہا ہے کہ وہاں ایک درخت ہے اور کچھ بندر درخت پر ادھر ادھر کود رہے تھے۔ مقامی لوگوں کے مطابق اس دوران ایک بندر بجلی کے تار میں پھنس گیا جو درخت کے بالکل قریب سے گزر رہا تھا۔ اس کے بعد وہ زمین پر گر گیا۔ بجلی کے جھٹکے سے بندر کا پورا جسم جھلس گیا اور وہ موقع پر ہی دم توڑ گیا۔
اس کے بعد جب لوگ بندر کی آخری رسومات کی تیاری کر رہے تھے تو کچھ ایسا ہوا کہ لوگ حیران رہ گئے۔ میڈیا رپورٹ کے مطابق اس وقت وہاں سے کچھ ہی فاصلے پر موجود ایک بندر مادہ آخری رسومات کی تیاریاں دیکھ رہی تھی۔ اچانک اس مادہ بندر نے اچانک اسی بجلی کے تار پر چھلانگ لگا دی جس پر کرنٹ لگنے سے بندر کی موت ہو گئی تھی۔
مادہ بندر بھی بجلی کا جھٹکا لگنے سے مر گئی۔ مادہ بندر کی اس موت کے بعد لوگ مختلف باتیں کرنے لگے۔ لوگوں نے کہنا شروع کر دیا کہ بندر کی موت سے پریشان بندر نے جان بوجھ کر بجلی کے تاروں پر چھلانگ لگا کر خودکشی کی۔