اقوام متحدہ کا انتباہ: غزہ میں انسانی المیہ، صورتحال انتہائی سنگین

نیویارک ۔ 21؍ اگسٹ ۔ (ایجنسیز): اقوام متحدہ نے غزہ کی پٹی میں اسرائیلی جارحیت کی وجہ سے پیدا ہونے والی انسانی بحران کی صورت حال کو تباہ کن قرار دیا ہے۔ عالمی ادارہ نے اس بات کی تصدیق کی ہے کہ غزہ میں انسانی المیہ جاری ہے اور صورتحال ہر گزرتے دن کے ساتھ بدتر ہوتی جارہی ہے۔
اقوام متحدہ کے ترجمان اسٹیفن ڈوجارک نے نیو یارک میں ایک پریس کانفرنس کے دوران کہا کہ ایندھن کی شدید قلت کی وجہ سے ہاسپٹلس میں ضروری سرجیکل آپریشنز کو ملتوی کیا جا رہا ہے۔ خاص طور پر شمالی غزہ میں ایمبولینس سروس مکمل طور پر بند ہونے کا خطرہ لاحق ہے۔
اقوام متحدہ کے رابطہ دفتر برائے انسانی امور (اوچا) نے بھی انسانی بحران کی سنگینی پر روشنی ڈالی ہے۔ دفتر نے اپنے بیان میں کہا کہ ”غزہ کی پٹی میں انسانی صورتحال تباہ کن ہے۔ بے گھر ہونے کی مسلسل لہریں، بھیڑ بھرا ماحول، عدم تحفظ، بنیادی ڈھانچے کی تباہی، اور مسلسل جنگ کی وجہ سے بنیادی ضروریات کی کمی واقع ہو چکی ہے۔”
اقوام متحدہ کے دفتر نے منگل کو جاری ایک بیان میں مزید کہا گیا ہے کہ ”لڑائیوں کے تسلسل، انخلاء کے احکامات، اور ضروری سامان کی شدید قلت کی وجہ سے بے گھر خاندانوں کے لیے بنیادی خدمات تک رسائی مشکل ہو گئی ہے۔”