جنین’ فلسطین۔ 18؍ اگسٹ ۔ (پی آئی سی): اسلامی تحریک مزاحمت ‘حماس’ کے عسکری ونگ عزالدین القسام بریگیڈ نے جنین میں قابض اسرائیلی فوج کے حملے میں اپنے دو کمانڈروں رفعت داواسی اور احمد ابو عرہ کی شہادت کو جنگی جرم قرار دیا ہے۔
بیان میں القسام بریگیڈ نے فلسطینی قوم اور عرب و مسلم امہ کے سامنے اپنے شہید مجاہدین رفعت محمود داواسی اور احمد ولید ابو عرہ کی شہادت پر تعزیت پیش کی ہے۔ دونوں مجاہدین کو ہفتے کی شام اسرائیلی فوج نے ان کی گاڑی پر بمباری کرکے شہید کیا۔
شہید کمانڈر احمد ولید ابو عرہ کا تعلق عقابا قصبے سے تھا، جبکہ رفعت داواسی جنین کے نواحی علاقے سیلہ الحارسیہ سے تھے۔ القسام نے دونوں شہداء کی خدمات کو شاندار خراج عقیدت پیش کرتے ہوئے ان کی قربانیوں اور قابض دشمن کے خلاف مزاحمت کو سراہا ہے۔
بیان میں کہا گیا ہے کہ دونوں مجاہدین نے قابض دشمن فوج کے خلاف کئی مسلح مزاحمتی کارروائیوں کی منصوبہ بندی اور ان پر عملدرآمد کیا، جس کے نتیجے میں دشمن کو بھاری جانی اور مالی نقصان پہنچا۔ انہوں نے 27 جون 2024 کو جنین میں ٹائیگر گاڑی پر بمباری اور ٹرپل کمپلیکس ایمبش آپریشن میں حصہ لیا، 23 جولائی 2024 کو المطولا گاؤں میں دشمن فوج پر حملے کیے، اور 11 اگست 2024ء کو ایک اور کارروائی میں شامل رہے۔
القسام بریگیڈ نے کہا ہے کہ ان کے شہید قائدین کا خون ضائع نہیں جائے گا اور دشمن کو ان کے خون کے بدلے مزید شدید مزاحمتی کارروائیوں کا سامنا کرنا ہوگا۔
