شمالی کوریا میں ظلم کی انتہاء ۔ غیر ملکی ٹی وی سیریل دیکھنے پر 30 بچوں کو سر عام گولی ماردی گئی

شمالی کوریا ۔15 ؍ جولائی۔ (یو ایل): شمالی کوریا میں غیر ملکی ٹی وی سیریل دیکھنے پر 30 بچوں کو موت کے گھاٹ اتار دیا گیا ہے۔اس ظالمانہ واقعہ کے حوالے شائع ہونے والی ایک رپورٹ میں کہا گیا ہے کہ ان نوجوان بچوں کو غیر ملکی ٹی وی ڈرامہ دیکھنے پر سر عام گولی مار دی گئی۔ یہ بچے جنوبی کوریائی ڈرامہ دیکھتے ہوئے پکڑے گئے تھے۔ جنوبی کوریا کے خبر رساں اداروں چوسن ٹی وی (Chosun TV) اور کوریا جونگئینگ ڈیلی (Korea JoongAng Daily) نے اس واقعہ پر رپورٹ شائع کی ہے۔ رپورٹ میں بتایا گیا ہے کہ ان نوجوانوں کو ڈرامہ دیکھنے کی پاداشت میں مبینہ طور پرگولی مار دی گئی۔ویسے تو شمالی کوریا میں میڈیا نشریات کو سختی سے کنٹرول کیا جاتا ہے۔ لیکن غیر ملکی ٹی وی شوز کے پائریٹڈ یو ایس بی اسٹکس سرحد پار سے اسمگل کئے جاتے ہیں۔
جنوبی کوریاکی یونیفیکیشن منسٹری کے ایک اہلکار نے اس بارے میں تفصیل سے جانکاری دی۔ انہوں نے بتایا، ‘شمالی کوریا میں تین ایسے قوانین ہیں جنہیں برے قوانین کے طور پر جانا جاتا ہے۔ اسی بنیاد پر شمالی کوریائی حکام اپنے لوگوں کو سختی سے کنٹرول کرتے ہیں اور خلاف ورزی کی صورت میں سخت سزائیں دیتے ہیں۔در حقیقت شمالی کوریا کے حکام اپنی ثقافت کو لیکر بہت سخت ہیں۔ یہی وجہ ہے کہ شمالی کوریا میں بنے کسی بھی میڈیا کنٹنٹ پر پوری طرح سے پابندی ہے۔ جب کبھی اسے نظر انداز کیا جاتا ہے تو شمالی کوریائی حکام اسکے خلاف کڑی کارروائی کرتے ہیں۔