جموں و کشمیر میں زلزلے کے جھٹکے۔ کئی گھروں میں دراڑیں پڑگئیں

جموں و کشمیر ۔ 20؍ اگسٹ ۔ (اردو لائیو): جموں و کشمیر میں 20؍ اگسٹ بروز منگل کی صبح یکے بعد دیگرے دو زلزلے آئے۔ نیشنل سنٹر فار سیسمولوجی کے مطابق، پہلا زلزلہ ریکٹر اسکیل پر 4.9 شدت کا تھا اور دوسرا 4.8 شدت کا تھا۔ زلزلے میں ایک شخص زخمی ہوا ہے، جبکہ کئی گھروں میں دراڑیں پڑ گئیں۔
مقامی محکمہ موسمیات کے ایک اہلکار نے بتایا کہ پہلا زلزلہ صبح 6 بجکر 45 منٹ پر آیا۔ اس کے چند ہی منٹوں کے اندر 6 بجکر 52 پر دوسرا زلزلہ آیا۔ دونوں کا مرکز بارہمولہ تھا۔ پہلا زلزلہ زمین سے 5 اور دوسرا 10 کلومیٹر نیچے آیا۔
اس سے پہلے 12 جولائی کو دوپہر قریب 12 بجے بارہمولہ میں زلزلہ آیا تھا۔ ریکٹر اسکیل پر زلزلے کی شدت 4.1 ریکارڈ کی گئی تھی۔ بیورو آف انڈین اسٹینڈرڈز (بی آئی ایس) کے سیسمک زوننگ میپ (زلزلہ جاتی زوننگ میپ) میں کشمیر وادی سب سے خطرناک زون 5 میں آتا ہے۔

زلزلے کیوں آتے ہیں؟
ہماری زمین کی سطح بنیادی طور پر 7 بڑی اور کئی چھوٹی ٹیکٹونک پلیٹس پر مشتمل ہے۔ یہ پلیٹس مسلسل تیرتی رہتی ہیں اور بعض اوقات یہ آپس میں ٹکرا جاتی ہیں۔ ٹکراؤ سے کئی بار پلیٹس کے کونے مڑ جاتے ہیں اور زیادہ دباؤ پڑنے پر یہ پلیٹس ٹوٹنے لگتی ہیں۔ ایسی حالت میں نیچے سے خارج ہونے والی توانائی باہر کی طرف نکلنے کا راستہ تلاش کرتی ہے اور اس خلل کے بعد زلزلہ آتا ہے۔